時間過得好快......

一眨眼，已經一個月。時間真係過得好快。一轉眼，已經係4個月啦。
5月2日，我同Steve 注冊，當時Steve一家人，我一家人，同埋我地啲好朋友，一齊去咗City Hall 見證我同Steve嘅好日子。雖然5月2日注冊，但係我地就決定咗9月26日擺酒。由于哩個暑假，Steve嘅cousin就會搬過嚟同我地一起住，所以，就想話，既然住咗冊，不如就提早度蜜月啦。5月22日，Steve嘅媽媽爸爸，開車送我同Steve上機去度蜜月。

6月5日，我同Steve度完蜜月翻嚟，6月6日，Steve嘅媽媽同姨媽一齊開車送兩個細嘅嚟紐約，之后就準備開車翻康州。由于果日我唔舒服，所以我冇陪佢地食飯。估唔到，喺機場果日，係我最后一次見佢。

6月7日大約凌晨5點幾，Steve收到佢爸爸嘅電話，話佢媽媽可能出咗事。之后警察就到咗佢爸爸屋企，然后就同Steve講，佢媽媽同姨媽出咗事。

佢地嘅離開，真係令到每一個人都好痛心。每次想翻起Steve剛剛由警察口中得知佢媽媽走咗果一刻，Steve痛心嘅表情，我到依家都冇辦法忘記。每隔一段時間，訓夜晚訓到一半，Steve傷心嘅表情就會喺我腦海出現，之后就訓唔到。

直到哩一刻，我都冇辦法相信Steve嘅媽媽已經走咗。每次想起，個心都好痛。Steve嘅媽媽照顧咗我6年，我都冇辦法接受，我更加難以想象Steve有幾痛！咁多年以來，Steve媽媽係最錫Steve，而Steve一直都好錫佢媽媽，一直都好努力，希望可以令佢媽媽享福，報答佢。雖然依家Steve冇機會報答佢媽媽，不過我地每一個人都知道，依家Steve媽媽喺天堂過著無憂無慮嘅生活，到咗天父嘅家，得到永生。

我好希望，Steve可以開心咁生活落去。希望佢開心唔開心都會同我講，希望我可以陪Steve走每一段路。

Steve嘅媽媽知道我地結婚，真係好開心！！如果佢知道，一定希望我地好好搞好個婚禮。
幸福并唔係必然。每日一都要珍惜。現有嘅家人，要好好珍惜。現有嘅工作，要好好珍惜。每一分，每一秒，都要珍惜。