七週年

今年嘅生日，係我同Steve七周年紀念，一轉眼，就七年啦。踏入第八年，將會有好多事情發生。我地開始供屋啦，注冊結婚啦，真正開始我地嘅家庭。
今年嘅生日，唔系最開心嘅一年，不過，已經係我意料之內嘅事，所以，并冇好似以前咁細路女脾氣，接受咗我另一半嘅踏實性格。就好似我同我朋友講嘅咁，冇得到嘅，係意料之內嘅事，即係理所當然；如果得到就會係意外驚喜。
原本，對于結婚買屋，本身嘅睇法係，結婚，係我盼望已久嘅事。買屋，就係一種我覺得負擔好辛苦嘅嘢。不過既然Steve肯同我努力，加上當時抱住買咗屋可以真正過婚後二人世界嘅盼望之下，我都好期待果一刻嘅來臨。但係，一切都將會改變。唔會再有二人世界。喺買屋嘅事上，我最盼望，最能說服自己嘅唯一盼望，將會落空。
本來，我係好想要BB，所以先好想結婚。但係，對于我嚟講，婚後二人世界係一世人一次，亦都好重要。所以我決定，我要有最少兩年二人世界嘅時間先會生BB。我唔知道我要等幾耐先會有二人世界，但係假設等待二人世界嘅時間係 X，咁我生BB嘅時間就會係 2008年 + X + 2.，如果我要等3年先等到二人世界嘅話，咁我就2013年先至生BB.....真係好漫長啊 -_-!